A Xunta informa favorablemente o novo mestrado de Matemáticas para impartirse no curso 2026-27

A proposta do novo mestrado de Matemáticas da Universidade de Santiago de Compostela recibiu un informe favorable por parte da Xunta de Galicia, de maneira que se impartirá no curso 2026-27.

Así llo trasladou esta mañá o conselleiro de Educación, Ciencia, Universidades e FP, Román Rodríguez, á vicerreitora de Titulacións e Internacionalización da Universidade de Santiago de Compostela, Mª José López, e ao decano da Facultade de Matemáticas, Alberto Cabada, nunha xuntanza de traballo na que tamén participou o secretario xeral de Universidades, José Alberto Díez.

A partir de agora, a Universidade de Santiago iniciará os trámites administrativos establecidos na normativa para solicitar a autorización oficial da oferta do mestrado, e que deberá incluír tamén informe por parte da Axencia para a Calidade do Sistema Universitario de Galicia (ACSUG) e aprobación definitiva por parte do Consello Galego de Universidades.