O IDEGA convoca a sétima edición do premio Valentín Paz Andrade de investigación en economía de Galicia

A sétima edición do Premio Valentín Paz Andrade de investigación en economía de Galicia acaba de ser convocada conxuntamente polo Consello Económico e Social de Galicia e o Instituto Universitario de Estudos e Desenvolvemento de Galicia (IDEGA) da USC. O obxecto do certame é premiar aqueles traballos de investigación que contribúan ao mellor coñecemento da realidade económico-social galega e ao establecemento das mellores políticas para contribuír ao benestar dos seus cidadáns.

O galardón está estruturado en dúas modalidades. A primeira delas está centrada en traballos publicados en revistas científicas ou en editoriais recoñecidas, entre o 15 de outubro de 2019 e o 14 de outubro de 2020; mentres que a segunda pon o foco en teses de doutoramento, presentadas en calquera universidade entre o 15 de outubro de 2019 e o 14 de outubro de 2020. O galardón da modalidade 1 está dotado con 2.000 euros, mentres que o traballo vencedor na modalidade 2 recibirá 1.000 euros. A resolución farase pública antes do 20 de decembro de 2020.

Ata o 15 de novembro deste ano, calquera membro do profesorado, persoal investigador ou da institución pode facer chegar á secretaría do IDEGA en horario de 9.00 a 14.00 horas, ou ben enviar por correo postal (IDEGA-Avda. das Ciencias, Chalet nº 1 Campus Vida – 15782 Santiago de Compostela) a súa proposta de candidatura ao premio. As solicitudes deben indicar autoría, título e información de edición, engadindo una copia en papel e a indicación dun mecanismo de acceso electrónico ao recurso ou copia en soporte USB. As bases completas do certame poden consultarse nesta ligazón.