Aberto o prazo para concorrer ás bolsas de verán para a iniciación á investigación nos Centros Singulares da USC
A USC acaba de convocar as bolsas de verán para a iniciación á investigación nos Centros Singulares da Universidade. Ata este venres 21 de maio, poderanse presentar as candidaturas para tomar parte nesta iniciativa dirixida a estudantes de alto nivel interesados en realizar prácticas formativas extracurriculares no marco dun proxecto desenvolvido no Centro Singular de Investigación en Medicina Molecular e Enfermidades Crónicas (CiMUS), no Centro Singular de Investigación en Tecnoloxías Intelixentes (CiTIUS), no Centro Singular de Investigación en Química Biolóxica e Materiais Moleculares (CiQUS) ou no Instituto Galego de Física de Altas Enerxías (IGFAE), centro mixto da Xunta de Galicia e da USC.
O alumnado adquirirá coñecementos e destrezas na área temática do seu proxecto de investigación e, asemade, participará nas actividades científicas do centro correspondente. As prácticas formativas extracurriculares que son obxecto destas bolsas terán unha duración dun mes e desenvolveranse nos períodos establecidos por cada Centro Singular. Á hora de adxudicar as bolsas valorarase o expediente académico (70%), o currículo (20%), así como a expresión de interese (10%) das persoas aspirantes.
No caso do CiQUS, as bolsas están dirixidas a persoas que están cursando estudos correspondentes ao último ou penúltimo curso do grao en Química ou titulacións relacionadas. Estar a cursar estudos correspondentes ao último ou penúltimo curso dos graos en Enxeñería Informática, Enxeñería de Telecomunicación, Física, Matemáticas ou disciplinas afíns é o requisito establecido polo CiTIUS. O CiMUS, pola súa parte, seleccionará a alumnado que estude o último ou penúltimo curso dos graos en Bioloxía, Farmacia, Medicina, Química ou doutra titulación relacionada. Finalmente, o IGFAE dirixe a súa convocatoria a persoas que cursen algún dos dous últimos anos de calquera grao na área Europea de Ensino Superior ou calquera outro sistema universitario. Resérvanse oito bolsas para o alumnado dos graos en Física, Matemáticas, dobre grao Matemáticas-Física, ou graos equivalentes. A presentación de solicitudes farase a través da Sede Electrónica da USC, empregando o formulario de solicitude dispoñible neste enderezo.