O último artigo do investigador do CIQUS Francisco Rivadulla (Starting Grant 2010), publicado na prestixiosa revista Nano Letters, describe un método doado para preparar unha soa capa densamente aliñada e homoxénea de nanocables ultrafinos de ouro, o cal permite obter uns electrodos con elevada condutividade, transparentes e flexibles. A investigación foi desenvolvida en colaboración con Miguel Correa-Duarte (Universidade de Vigo).
A combinación de baixa resistencia eléctrica e alta transparencia óptica nun só material é moi infrecuente. Por esa razón, o desenvolvemento destes sistemas non é só un reto científico senón tamén unha necesidade tecnolóxica co fin de substituír o ITO (óxido de indio dopado con estaño) en compoñentes electrónicos flexibles e outras aplicacións altamente esixentes, como por exemplo pantallas de cristal líquido, pantallas de plasma, paneis táctiles (tabletas, teléfonos móbiles...) ou LEDs.
Aínda que ITO é un dos materiais máis amplamente usados para a maioría das películas transparentes e condutoras fabricadas hoxe en día, a súa escaseza, os complexos requisitos de procesamento e a súa falta de flexibilidade limitaron en certo xeito a súa aplicación xeneralizada.
As películas depositadas que se explican neste traballo, mostran un rendemento eléctrico / óptico competitivo con ITO e outros electrodos baseados no grafeno. Por outra parte, a películas de ouro presentan unha boa estabilidade en condicións ambientais e, ademais, a gran relación de aspecto (a relación ancho-longo) dos nanocables ultrafinos fainos perfectos para a deposición en substratos flexibles, necesario para a súa utilización nos dispositivos eletrónicos flexibles.
Francisco Rivadulla pertence ao CIQUS e é membro do Grupo de Magnetismo e Nanotecnoloxía de Investigación (NANOMAG) da Universidade de Santiago de Compostela.
Figura 1 (esquerda): Imaxe dun substrato de vidro recuberto de nanofíos de ouro e detalle (imaxe TEM) dos nanofíos de ouro. O substrato de vidro mantén a súa transparencia pero adquire unha elevada condutividade eléctrica debido aos fíos de ouro.
Figura 2 (dereita): Imaxe TEM dos nanofíos de ouro a diferentes escalas e detalle dos nanofíos de ouro en disolución.