-
A condutividade térmica nos cristais líquidos pode ser modificada tras dopar este material con moléculas de azobenceno e irradialo con luz. O novo estudo do CiQUS foi destacado na portada de Journal of Materials Chemistry C.
Front cover in Journal of Materials Chemistry C | Royal Society of Chemistry
A condutividade térmica nos cristais líquidos pode ser modificada tras dopar este material con moléculas de azobenceno e irradialo con luz. É a principal conclusión á que chega un novo estudo levado a cabo entre dous grupos do Centro Singular de Investigación en Química Biolóxica e Materiais Moleculares (CiQUS) da Universidade de Santiago de Compostela e que agora foi destacado na portada do último número de Journal of Materials Chemistry C.
Determinados desafíos actuais, por exemplo previr o sobrequecemento dos dispositivos electrónicos mediante a disipación térmica, poderían abarcarse mediante o deseño de novos materiais funcionais cuxa condutividade térmica poida ser regulable. Entre estes materiais de interese atópase a familia dos cristais líquidos, con aplicacións tan atractivas como as pantallas LCD de moitos aparellos electrónicos. O novo estudo demostra que as moléculas de azobenceno poden ser utilizadas para controlar a condutividade térmica dos cristais líquidos empregando luz ultravioleta.
“Os azobenzenos son un tipo de moléculas cuxa estrutura cambia coa luz, polo que ao engadilas ao cristal líquido o transporte térmico de todo o sistema pode ser modificado directamente se se irradia con luz” explica Noa Varela, doutoranda do CiQUS e primeira autora do estudo. “Dependendo da disposición molecular do cristal líquido, coa iluminación poderíase conseguir de maneira reversible un incremento ou unha diminución da condutividade térmica, a temperatura ambiente”. Dada a enorme variedade de cristais líquidos, o traballo xurdido da sinerxia entre os grupos de María Giménez e Fran Rivadulla abre novas posibilidades para o deseño de conmutadores térmicos efectivos a partir de materiais moleculares.
Referencia
Light-induced bi-directional switching of thermal conductivity in azobenzene-doped liquid crystal mesophases. Noa Varela-Domínguez, Carlos López-Bueno, Alejandro López-Moreno, Marcel S. Claro, Gustavo Rama, Víctor Leborán, María del Carmen Giménez-López and Francisco Rivadulla*. Journal of Materials Chemistry C 11 (14), 4588-4594. DOI: 10.1039/D3TC00099K
De esquerda a dereita: Dr. María Giménez, Noa Varela and Prof. Francisco Rivadulla