-
Investigadores do CiQUS en colaboración con científicos da Universidade Nova de Lisboa deseñan novos compostos moleculares para a entrega de péptidos cuxo paso a través da membrana actívase ao ser irradiados con luz.
-
O traballo publicado en JACS supón un avance no desenvolvemento de sistemas de transporte por control remoto con aplicacións biolóxicas e farmacolóxicas.
-.
Reference
Photoswitchable Calixarene Activators for Controlled Peptide Transport Across Lipid Membranes. Joana Martins, Beatriz Raimundo, Alicia Rioboo, Yeray Folgar-Cameán, Javier Montenegro, Nuno Basílio. Journal of the American Chemical Society. Article ASAP DOI: 10.1021/jacs.3c01829
Na viaxe ao interior da célula, abrirse paso a través da membrana supón todo un desafío. As biomoléculas de maior tamaño adoitan recorrer a distintos mecanismos de transporte para superar a dobre capa de lípidos que conforma a membrana e penetrar na célula. Neste escenario, o deseño de novas estratexias que permitan o paso de substancias bioactivas, por exemplo fármacos, é unha prioridade. Entre estes sistemas transportadores, os vehículos artificiais sensibles á luz son especialmente interesantes en canto permiten ser activados de maneira remota, non producen residuos químicos e demostraron unha gran precisión.
Investigadores do Centro Singular de Investigación en Química Biolóxica e Materiais Moleculares (CiQUS) da Universidade de Santiago de Compostela xunto a un equipo de científicos da Universidade Nova de Lisboa (NOVA) deseñaron novos vehículos moleculares sensibles á luz para o transporte de péptidos ao interior da célula. "O noso deseño se basa en receptores de calixareno que incorporan unha unidade de azobenceno que funciona a modo de contraión fotosensible e permite controlar o transporte de péptidos catiónicos" comenta Javier Montenegro, Investigador Principal do CiQUS. Os contraiones únense á carga formando neste caso compostos de carga neutralizada con maior permeabilidade na membrana. Cando son irradiados con luz, os azobencenos son capaces de cambiar a súa estrutura para pasar dunha configuración máis polar a unha máis hidrofóbica, o que lles permite desembarcar con éxito no citosol. "O control dinámico sobre a estrutura e a polaridade destes activadores de contraión empregando luz é unha estratexia prometedora no desenvolvemento de transportadores que sexan sensibles a estímulos externos" explica Nuno Basílio, investigador en NOVA e coautor do traballo recentemente publicado na prestixiosa revista Journal of the American Chemical Society (JACS).
Segundo os autores, a síntese destes activadores moleculares demostrou o seu potencial para a entrega teledirixida de biomoléculas e, entre outras aplicacións, albisca novas posibilidades na entrega de fármacos mediante control remoto.
-.