Aínda que a pandemia orixinada polo SARS-CoV-2 quedase atrás, o seu eco aínda persiste e son moitas as incógnitas que os científicos tentan despexar. Hoxe sabemos que para moitos pacientes de COVID-19, o final da etapa aguda da infección é só o comezo doutra experiencia difícil: o post-COVID. Durante o denominado COVID persistente ou long COVID, estas persoas desenvolven unha amálgama de síntomas prolongados que poden incluír dificultade respiratoria, fatiga, tose ou perda de olfacto, entre outros. Algúns estudos apuntan a unha disfunción inmune, outros sinalan a unha inflamación persistente, pero o mecanismo fundamental do COVID persistente aínda non está claro. Unha abafadora maioría destas investigacións centráronse na etapa aguda desta afección, polo que hai falta de información sobre determinadas alteracións que teñen lugar nas últimas fases da enfermidade. .
Un novo estudo liderado pola investigadora do Centro Singular de Investigación en Química Biolóxica e Materiais Moleculares (CiQUS) Rebeca García Fandiño e con Pablo F. Garrido como autor principal, lanza luz sobre os cambios nos lípidos sanguíneos de pacientes con COVID persistente. A investigación supón un avance na comprensión destas secuelas e abre a porta para mellorar o seu tratamento. Os expertos analizaron o plasma de 147 pacientes con COVID persistente. Utilizando técnicas de lipidómica, estudaron un espectro de case 400 lípidos polares distintos. A partir de aí, recorreron a técnicas avanzadas de minería de datos e aprendizaxe automático para desenvolver modelos de clasificación precisos que distinguen entre pacientes sintomáticos e asintomáticos de COVID persistente. A análise revelou alteracións específicas relacionadas coa inflamación e a resposta inmunolóxica continua, ofrecendo unha nova perspectiva sobre a natureza persistente do COVID. Ademais, algúns destes lípidos foron identificados como potenciais biomarcadores, permitiríao levar a cabo diagnósticos máis precisos e desenvolver tratamentos específicos para esta enfermidade.
O achado, publicado recentemente en Journal of Infection and Public Health, foi posible grazas á colaboración entre médicos e investigadores de distintos perfís. O proxecto reuniu a expertos de CiQUS, a Facultade de Física da Universidade de Santiago de Compostela, o Complexo Hospitalario Universitario de Santiago (CHUS), a Universidade de Córdoba e a Universidade do País Vasco. A loita contra as infeccións víricas, como a provocada polo SARS-CoV-2, a través do descubrimento de novas estratexias de diagnóstico constitúe unha das prioridades científicas do CiQUS. O equipo da Dra. García Fandiño está especializado en aplicar técnicas computacionales para explorar a estrutura e a función das membranas lipídicas, como diana de interacción con biomoléculas.
"Esta investigación complementa os achados recentes no campo da proteómica, onde se relacionou ao COVID persistente con alteracións a nivel proteico" sinala a Investigadora Principal do CiQUS. Ambos os enfoques, proteómico e lipidómico, son fundamentais para unha comprensión integral da enfermidade, destacando a importancia dunha visión multifacética na investigación médica. García Fandiño destaca que o presente traballo "non só engade unha peza crucial ao crebacabezas do COVID persistente senón que tamén recalca a necesidade de explorar diversos camiños científicos para desentrañar os mecanismos detrás das secuelas virales. Con estes avances, estamos un paso máis preto de desenvolver terapias máis eficaces e personalizadas, mellorando así a calidade de vida de quen enfronta os efectos prolongados do COVID-19".
Referencia
Lipidomics signature in post-COVID patient sera and its influence on the prolonged inflammatory response. P.F. Garrido, L.S. Castillo-Peinado, F. Priego-Capote, I. Barrio, Á. Piñeiro, M.J. Domínguez-Santalla, E. Rodríguez-Ruiz, R. Garcia-Fandino J. Infect. Public Health, 2024, 17, 588-600
