Cidade da Saúde

O proxecto de Cidade da Saúde é unha iniciativa que vai mudar a concepción das infraestruturas da USC dedicadas á docencia, investigación e transferencia de coñecemento no eido das Ciencias da Saúde. A súa concepción foi presentada e compartida con responsables dos centros afectados logo de ser informados o Claustro e o Consello de Goberno da Universidade así como tamén os gobernos autonómicos e local.

A Cidade da Saúde concíbese a partir dunha vontade integradora e de reforzo das actividades sanitarias de carácter asistencial, docente e investigador co obxectivo de contribuír, con isto, a que Galicia sexa un referente da docencia, da investigación e da colaboración institucional e público-privada no ámbito da saúde.

Proposta

A proposta do proxecto da Cidade da Saúde deséñase arredor dos seguintes obxectivos:

• Dispor dun conxunto de dotacións suficientes para dar soporte material á docencia e a investigación de vangarda no ámbito das Ciencias da Saúde.

• Inserir de forma coherente e integrada estas instalacións nun espazo urbano no que xa existen dotacións moi importantes no ámbito sanitario.

• Intervir urbanisticamente para conectar áreas moi importantes da cidade de Santiago no que se refire á actividade académica, científica e asistencial.

• Modernizar as infraestruturas e a urbanización do espazo público, conectando e aumentado as zonas verdes e de mobilidade alternativa.

Principios e actuacións

A saúde é un elemento esencial. Por este motivo, o Sistema Público de Saúde é un dos piares das políticas públicas ao que se destina arredor dun 35% dos orzamentos da Comunidade. A Cidade da Saúde pon o foco en:

• Promover a formación de calidade dos profesionais que serán os que respondan aos retos futuros que deba afrontar o ámbito sanitario galego.
• Estimular a investigación, a transferencia e a colaboración público-privada.

As principais actuacións previstas son:

• Rehabilitación do edificio de San Francisco, actual sede da Facultade de Medicina e Odontoloxía.
• Construción da Sede de Ciencias da Saúde no Campus Sur.
• Reurbanización da Praza do Seminario de Estudos Galegos.
• Reorganización da mobilidade urbana integrando a Universidade na cidade.
• Aplicación dos principios de eficiencia e sustentabilidade.