O Colexio de Fonseca acolleu a homenaxe dos colexios profesionais sanitarios de Galicia ás vítimas da Covid-19

Os 31 colexios profesionais sanitarios de Galicia, que aglutinan a preto dunha vintena de profesións, renderon homenaxe este martes no Colexio de Fonseca da USC ás vítimas da COVID-19 nun acto no que tamén se deixou constancia do recoñecemento polo labor desenvolvido polos profesionais da saúde. Esta é unha iniciativa do Consello Galego de Colexio Médicos na que unha representación de cada colexio deu lectura a un parágrafo dun manifesto no que se lembrou ás vítimas e a repercusión da pandemia entre os profesionais e na sociedade.

O manifesto recolle o carácter “histórico” da iniciativa xa que “nunca antes en Galicia a totalidade das profesións sanitarias colexiadas se agruparon  nunha actuación colectiva desta natureza”. Así, estiveron representados os colexios oficiais de Biólogos de Galicia; de Dentistas de Pontevedra e Ourense; de Dietistas-Nutricionistas de Galicia; de Enfermería da Coruña, Lugo, Ourense e Pontevedra; de Farmacéuticos da Coruña, Lugo, Ourense e Pontevedra; de Fisioterapeutas de Galicia; de Hixienistas Dentais de Galicia; de Logopedas de Galicia; de Médicos das provincias da Coruña, Lugo, Ourense e Pontevedra; de Odontólogos e Estomatólogos da Coruña e de Lugo; de Ópticos-Optometristas de Galicia; de Podólogos de Galicia; de Protésicos Dentais de Galicia; de Psicoloxía de Galicia; de Químicos de Galicia; de Terapeutas Ocupacionais de Galicia; de Traballo Social de Galicia; de Veterinarios da Coruña, Lugo, Ourense e Pontevedra.