A sesión enmárcase dentro da conmemoración do trixésimo aniversario desta Fundación
A Sala de Xuntas da Facultade de Veterinaria será o escenario, este venres 20, do acto de entrega de Insignias da Fundación Rof Codina en recoñecemento ás traxectorias de Luis F. de la Cruz Palomino e José Luis Pereira Espinel. O acto terá lugar ás 13.30 horas e enmárcase dentro da conmemoración do trixésimo aniversario da Fundación.
O reitor da USC, Antonio López Díaz, membros do Padroado da Fundación Rof Codina e da Asociación de Hospitais Veterinarios Universitarios acompañarán a Luis F. de la Cruz Palomino, profesor emérito ad honorem da USC e ex xerente do Hospital Veterinario Rof Codina, e a Mª Dolores Plata, viúva de José Luis Pereira Espinel, quen ocupou o cargo de director veterinario deste hospital universitario entre o ano 1995 e ata o seu falecemento en 2006, neste acto de homenaxe. No transcurso da sesión, haberá unha rolda de intervencións en representación das persoas homenaxeadas e das institucións que integran o Padroado.