Dispoñible a edición 2025 de Journal Citation Reports

O informe anual de Clarivate, que analiza o impacto das citas académicas nas revistas científicas, xa está publicado cos datos correspondentes ao ano 2024. Entre as novidades desta edición destaca o cambio á hora de xestionar as retractacións para protexer o JIF de posibles distorsións.

Xoves, 19 de xuño de 2025

Clarivate vén de publicar a edición de 2025 de Journal Citation Reports, no que se reflicten os datos correspondentes ao ano 2024. Nesta edición, a número 50, e como se indica na páxina web de Clarivate, continúase coa expansión do Journal Impact Factor (JIF) e as clasificacións combinadas dos últimos anos, de xeito que nesta última edición séguese a proporcionar JIF a todas as revistas elexibles en Web of Science Core Collection. O JIF evoluciona así cara un marcador a nivel revista, tanto de impacto como de fiabilidade en todas as disciplinas.

Outras das novidades destacables é o cambio na xestión das retractacións para evitar distorsións e diminución da fiabilidade dos datos obtidos. Así, as citas cara contidos e desde contidos retractados, non se contabilizan nas métricas deste ano. Este cambio reduce o risco de inflación das métricas debido a traballos defectuosos e fraudulentos, e reforza a responsabilidade na publicación académica.

Nesta edición de 2025 inclúense máis de 22.000 revistas de 111 países, divididas en 254 categorías.

Podes obter máis información nesta páxina de Clarivate.