O obxectivo destas sesións divulgativas de periodicidade mensual é coñecer en sociedade a vitalidade das investigacións en marcha
O Centro de Investigacións Feministas e de Estudos de Xénero promove unha nova sesión con Enrique Latorre, profesor da área de Lóxica e Filosofía da Ciencia da USC e integrante do CIFEX. Esta nova sesión terá lugar o mércores 4 de outubro, das 18.00 ás 20.00 horas, na Sala Hipatia Facultade de Filosofía.
O obxectivo destas sesións divulgativas de periodicidade mensual é coñecer en sociedade a vitalidade das investigacións en marcha, poñendo os resultados ao servizo da cidadanía e mostrando, ao tempo, que moitas investigadoras cuxo traballo é coñecido en circuítos especializados son descoñecidas aínda na sociedade galega, que procura referentes noutras xeografías.
Estas sesións están dirixidas a un público amplo, profesorado e estudantado universitario galego (dentro e fóra da USC), profesorado de Ensino Medio ou Primario e a variados perfís profesionais de persoas interesadas na perspectiva de xénero e na súa implicación nos últimos avances de coñecemento, con especial atención ás posibilidades de participación dese público nas investigacións posteriores no que se chama ciencia cidadá.