O foro de análise promovido polo xornal dixital Campo Galego comezará ás 17.00 horas e contará coa participación de voceiros do PP, PSOE, En Común Podemos, BNG e Marea Galeguista O reitor da USC, Antonio López, abrirá o acto cun breve saúdo aos participantes e ao público asistente ao debate, que tamén se emitirá en directo a través de Facebook Live
As propostas de futuro para o agro galego na próxima lexislatura centrarán o próximo venres 26 de xuño, a partir das 17.00 horas, na Escola Politécnica Superior de Enxeñaría do Campus de Lugo da USC, o primeiro debate da campaña electoral centrado no medio rural, organizado polo xornal dixital Campo Galego, e no que intervirán como relatores voceiros políticos de PP, PSOE, En Común Podemos, BNG e Marea Galeguista.
O reitor da USC, Antonio López, abrirá este foro de análise e debate sobre o medio rural promovido por Campo Galego xunto coa USC cun breve acto de acollida aos relatores así como a público participante nunha sesión que tamén se emitirá en directo a través de Facebook Live, a fin de respectar as limitacións de aforo establecidas na normativa sanitaria vixente por mor da pandemia derivada da COVID-19.
O debate, que estará moderado polo xornalista de Campo Galego Camilo Friol, xirará arredor de seis bloques temáticos, nos que ademais de afondar sobre as causas e as posibles solucións á crise provocada polo coronavirus no agro, os distintos voceiros políticos convidados tamén terán ocasión de presentar e expoñer as súas propostas de futuro para un sector de vital importancia para a vida social e económica de Galicia. Entre os temas que se abordarán figura o próximo ciclo da Política Agraria Común (PAC), cuestións candentes como a base territorial e o relevo xeracional das explotacións, así como os retos de futuro de gandería, agricultura e sector forestal.
O director xeral de Gandería, Agricultura e Industrias Alimentarias da Xunta de Galicia, José Balseiros Guinarte, actuará como representante do PP neste debate sobre o agro galego, unha sesión na que tamén intervirán como relatores o profesor da USC Manuel Francisco Marey, que concorre ás eleccións autonómicas na candidatura do PSdeG-PSOE, e o voceiro de Medio Ambiente do Grupo Común da Esquerda no Parlamento de Galicia, Marcos Cal. O deputado nacionalista Xosé Luis Rivas Mini, e o xeólogo ambiental e traballador do SLG na comarca da Mariña, Iván Rodríguez Lombardero, en representación de Marea Galeguista, completan o cartel de interlocutores. A sesión rematará cunha quenda aberta de preguntas, durante a que o público presente poderá trasladar a súas interpelacións aos voceiros das formacións políticas representadas.
Debido á situación de emerxencia sanitaria o aforo é restrinxido e será exclusivamente por invitación, podendo seguirse en directo a través da conta de Facebook do xornal Campo Galego