O estudantado poderá enviar vídeos con cuestións matemáticas que responderán integrantes do consorcio
O Centro de Investigación e Tecnoloxía Matemática de Galicia (CITMAga), consorcio público das tres universidades galegas, estrea este xoves 30 de novembro o seu Consultorio VídeoMatemático, ao que o estudantado poderá enviar vídeos con cuestións matemáticas que responderán expertas e expertos da entidade.
A presentación desenvolverase a partir das 11.00 horas na Aula Magna da Facultade de Matemáticas compostelá, coa charla de divulgación titulada 'Números máxicos!' a cargo da profesora Elena Vázquez Abal. A continuación desenvolverase a presentación do Consultorio VideoMatemático, coa participación da decana da Facultade de Matemáticas da USC, M. Elena Vázquez Cendón; da directora científica do CITMAga, Rosa M. Crujeiras Casais; e da investigadora principal do proxecto e catedrática de universidade da área de Xeometría e Topoloxía, Elena Vázquez Abal, así como do presidente da Comisión de Divulgación Científica, Miguez Brozos Vázquez, entre outras persoas. A partir das 12.00 horas abrirase unha rolda de preguntas. Asistirán a este evento estudantes do IES Eduardo Pondal de Santiago, ademais de persoal científico investigador do eido das matemáticas.
O proxecto, que nace para achegar a matemática á sociedade, está financiado pola FECYT, FSP-Ministerio de Ciencia e Innovación, e conta con persoal investigador e de divulgación científicas das tres universidades galegas.
Como participar
Se tes un perfil público en redes sociais:
1) Para recoller a información sobre intereses e dúbidas matemáticas analizaranse os vídeos recibidos, que deberán ser vídeos curtos, en formato vertical, propoñendo unha dúbida ou cuestión matemática para que as expertas e expertos de CITMaga lle dean resposta.
2) Os vídeos haberá que publicalos preferiblemente en Instagram (no perfil), co cancelo #CuestionDeMates e mencionar sempre a etiqueta @citmaga en Instagram. Desta maneira, o persoal do CITMaga poderá localizar o vídeo.
3) No caso de non ter perfil de Instagram o vídeo pode enviarse a través da canle de X, co cancelo #CuestionDeMates e mencionando a etiqueta @CITMAga.
4) Ademais, de non ter un perfil propio nas redes sociais, o envío dos vídeos pódese facer a través da conta institucional do centro de estudo, asociación ou instituto.
Se non tes un perfil privado en redes sociais:
1) Os vídeos haberá que envíalos a citmaga [at] citmaga.gal (citmaga[at]citmaga[dot]gal)
2) Neste caso deberán chegar cunha vosa autorización para poder publicar o vídeo nas redes sociais de CITMaga, e asinar a autorización de “Cesión de Dereitos de Imaxe”.
O prazo de envío de vídeos comezará o xoves 30 de novembro e rematará o 31 de xullo de 2024. Unha vez remate o prazo analizaranse os materiais e seleccionaranse os vídeos participantes no concurso #CuestionDeMates. A clasificación dos vídeos farase en tres fases no 2024 (xaneiro, abril e setembro), nas que se irán publicando na canle de Youtube do CITMAga aqueles vídeos recibidos que destaquen pola súa orixinalidade e/ou seu interese matemático. O concurso resolverase no mes de novembro de 2024.
