Relatorio ‘Tod@s xunt@s no proceso de transformación para as cidades sustentábeis? Avaliación da participación cidadá en Bonn, Alemaña’

O Seminario de Futuros Urbanos do Grupo ANTE retoma a súa programación este xoves 17 coa participación da profesora e investigadora posdoutoral da Universidade de Bonn (Alemaña) Juliane Dame, que pronunciará o relatorio ‘Tod@s xunt@s no proceso de transformación para as cidades sustentábeis? Avaliación da participación cidadá en Bonn, Alemaña’. A charla será ás 19:30 horas na Aula 18 da Facultade de Xeografía e Historia.

Juliane Dame é doutora en Xeografía pola Universidade de Heidelberg. A súa investigación céntrase en temas de inseguridade hídrica, gobernanza ambiental, adaptación ás alteracións climáticas, xustiza alimentar e desenvolvemento urbano. Realizou a súa tese de doutoramento sobre seguridade alimentaria nas Himalaias e dirixiu un grupo de investigación interdisciplinar no Heidelberg Center for the Environment (HCE) explorando a gobernanza da auga en rexións áridas da India e Chile.

Interveu ademais como investigadora principal en dous proxectos de avaliación sobre a participación cidadá en procesos de transición urbana sustentable na cidade de Bonn dos que falará na súa charla.