O Campus Terra cobra relevancia no sector ‘agrotech’ e sitúa a ‘startup’ Innogando entre as de maior proxección de España
O Campus Terra da USC é cada vez máis protagonista no puxante sector ‘agrotech’ de España, que lidera o número de empresas deste sector en Europa logo da constitución dunhas 750 iniciativas empresariais na última década. A inclusión de Innogando, unha empresa agromada na sede universitaria luguesa a iniciativa do entón estudante de Veterinaria de Cospeito, Elio López, entre as 15 ‘startups’ nacionais con maior proxección, segundo se recolle no último ránking publicado por El Referente, a revista líder de información sobre startups e innovación en España.
A progresiva aplicación de avances tecnolóxicos está a acelerar a modernización do tradicional mundo agrario, tanto no que atinxe á mellora da súa rendibilidade e eficiencia como ás condicións laborais e de benestar das persoas que traballan neste sector. Esta conxuntura, unida ao carácter esencial do sector agrícola para proveer recursos alimentarios, propicia o xurdir de novas startups ao tempo que aumenta un volume de negocio que en 2020 superou os 21.000 millóns de euros, máis dun 15% máis, segundo recolle o informe AgriFoodTech.
O CEO de Innogando, empresa nada ao abeiro do programa Explorer, que lanzará o 13 de outubro a súa nova convocatoria no portal SantaderX, Elio López, sinala neste senso que o cometido desta empresa é o de mellorar o grao de benestar do sector agrogandeiro a través da achega de recursos tecnolóxicos para empresas, produtores e que tamén redunden en beneficio do consumidor final. Nesta liña, López destaca a robótica, a conexión a internet con baixo consumo enerxético, os drons e, entre outros, as tecnoloxías de sensorización e de recollida de datos, como avances que reportan beneficios para o desenvolvemento do sector agrogandeiro e da súa industria.
Alén de Innogando, a contribución do Campus de Lugo da USC a este despegue do sector ‘biotech’ non é menor, tal e como indican desde a Área de Valorización, Transferencia e Emprendemento da USC, que fan fincapé nas iniciativas empresariais que saen da comunidade universitaria no ámbito biotecnolóxico, unha relación cada vez máis ampla e entre as que cómpre citar 3edata, TasteLab, Timbersoul, iBoneLab ou, startups como Aleutos o Aobá Upciclyng, tal e como se denomina a proposta de Karol Farias, que acadou o primeiro premio da Semana da moda circular e sustentable de Madrid.
