Elaboran dous repositorios científicos de información para evidenciar a dimensión humana e social dos océanos
O grupo de Traballo do International Council for the Exploration of the Sea (ICES) sobre Resiliencia e Servizos Ecosistémicos Marinos (WGRMES) que coordina o profesor da USC Sebastián Villasante acaba de crear dous repositorios con información de casos de estudo que están dispoñibles para que os investigadores contribúan a amplialo co seu traballo e o usen na divulgación científica.
“Este repositorio activo enriquecerá o noso coñecemento sobre a dimensión social dos océanos coa fin de axudar a quen toma decisións a ter en conta o factor humano nas políticas costeiras”, explica Villasante, que aclara que están recompilando casos de estudo “no só en Europa senón en todo o mundo”.
Cambio social O primeiro dos repositorios, vinculado á dimensión humana dos océanos, documenta as transformacións sociais dos sistemas mariños socio-ecolóxicos en Europa e no resto do mundo. O traballo, desenvolvido grazas a un proxecto do Fondo CIEM Science, inclúe información detallada e innovadora sobre os diferentes usos e impactos humanos nos océanos e os seus impulsores. Coordinado polo profesor Villasante e Olivier Guyader, de AMURE (Francia), nel participaron tamén IFREMER (Francia), IEO, ARVI (España) e Universidades de Aveiro (Portugal) e de Abeerden (Reino Unido).
A maioría das investigacións sobre os sistemas socio-ecolóxicos mariños e a sustentabilidade centrouse nas transformacións dos ecosistemas mariños e as súas funcións ecolóxicas, pero ata hoxe non había unha recompilación de datos estandarizada sobre as transformacións sociais provocadas polos cambios nos océanos. O repositorio que xurde agora é a primeira iniciativa, ao estandarizar os factores ambientais, institucionais, económicos e financeiros interconectados destes sistemas. Con el comprenderanse melllor cales son os cambios sociais necesarios para evitar resultados non desexados nas comunidades costeiras.
Servizos culturais do ecosistema mariño O WGRMES desenvolveu un segundo repositorio sobre os servicios culturais dos ecosistemas mariños e costeiros. Os servizos ecosistémicos mariños son os beneficios que os humanos obteñen dos ecosistemas que sustentan, directa ou indirectamente, a súa supervivencia e calidade de vida no planeta e que tamén contribúen ao desenvolvemento da economía global. Os culturais reflicten as interaccións físicas e cognitivas das persoas coa natureza e son cada vez máis recoñecidas por proporcionar beneficios non materiais ás sociedades.
Esta base de datos ten como obxectivo analizar o estado da investigación sobre eses servicios ecosistémicos, identificar as brechas de coñecemento e as prioridades de investigación. Inclúense así os resultados dunha revisión da literatura existente, que sintetizou un subconxunto de 72 publicacións revisadas por pares.