O evento internacional ‘Pint of Science’ chega a Santiago a próxima semana

O festival internacional ‘Pint of Science’ volverá levar a ciencia fóra dos laboratorios para mostrala dun xeito relaxado e distendido a toda persoa interesada. A través de charlas, científicos/as de todas as áreas de coñecemento achegaranse aos bares para contar de maneira amena e próxima qué estudan, por qué, o que agardan aprender, os logros alcanzados e tamén os fracasos e o que queda por descubrir.

A edición de Santiago celebrarase entre o próximo luns 15 e o mércores 17 coa colaboración da USC e a participación de recoñecidos investigadores/as, entre os que se atopan Antonio Salas, que falará de como de parecidos somos cando nos miramos a través do espello do xenoma, ou de José Luis Mascareñas, para explicar a química que se atopa detrás de toda forma de vida. O evento celebrarase na Nave de Vidán ás 20.30 horas con entrada gratuíta ata completar o aforo.

Cada unha das tres xornadas da próxima semana en Santiago leva un lema monográfico: ‘De hormonas e xenes’, a do luns 15, co participación de María José Martínez Patiño (Universidade de Vigo), Antonio Salas Ellacuriaga (USC), David Posada (UVigo), e o monólogo do gañador do festival Famelab 2015 Álvaro Morales Molina; ‘Mente Marabillosa’, o martes 16, e a presenza de Javier Cudeiro Mazaira (Inibic, A Coruña), Iria Veiga (USC), Javier Costas (IDIS) e o monólgo da gañadora de Famelab 2016 Alba Aguión; e ‘Dos átomos ás galaxias’, o mércores 17, con José L. Mascareñas (USC), Javier Mas Solé (USC), Víctor Pardo (USC), Xacobo de Toro (IES Urbano Lugrís, Malpica de Bergantiños).