A USC e a Cámara de Comercio de Santiago asinarán un convenio de colaboración para a realización de prácticas do alumnado de Ciencias Económicas e Empresariais

O reitor da USC, Juan Casares, e o presidente da Cámara de Comercio de Santiago, Jesús Asorey, asinarán este martes 10 un convenio para a organización de prácticas en empresas do alumnado da Facultade de Ciencias Económicas e Empresariais. O acto protocolario de sinatura celebrarase a partir das 11.30 horas no Salón Reitoral do Colexio de San Xerome. O acordo pretende regular a programación, desenvolvemento e verificación de períodos de prácticas tuteladas do alumnado que cursa estudos nos graos de Administración e Dirección de Empresas e no de Economía. O estudantado que acceda a estas convocatorias desenvolverán tarefas acordes ao seu nivel de formación de xeito que lle permite adquirir unha experiencia enriquecedora en relación ao seu futuro profesional.