USC e Deputación convocan axudas para que o alumnado de Ensino Medio da provincia de Lugo participe nos ‘Encontros no Campus Terra’

O Programa A Ponte entre o Ensino Medio e a USC ten previsto organizar unha nova edición dos “Encontros no Campus Terra” os días 15 de febreiro, 23 de marzo e 24 de abril coa intención de dar a coñecer ao alumnado preuniversitario, tal e como xa sucedeu en anos anteriores, a oferta académica e de servizos que presenta a USC no Campus Terra.

Coa finalidade de facilitar a participación do alumnado de ensino secundario nestas xornadas, USC e Deputación convocan axudas para sufragar os gastos derivados do traslado dos mozos e mozas á cidade de Lugo dende distintos puntos da provincia, coa excepción da súa capital. As devanditas axudas poderán ser solicitadas por calquera centro público ou privado que imparta Bacharelato e/ou Ciclos Formativos Superiores, e estarán destinadas a sufragar o traslado de alumnado de segundo de BAC e CFS.

As solicitudes deben enviarse ao enderezo aponte.lugo [at] usc.es (aponte[dot]lugo[at]usc[dot]es) antes do 19 de xaneiro de 2018. Neste enlace pode descargarse o texto completo da convocatoria e o modelo de solicitude.