A Biblioteca Intercentros do Campus Terra da USC celebra este xoves un acto polo vixésimo aniversario

A Biblioteca Intercentros do Campus Terra da USC organiza este xoves 14 de decembro, a partir das 18.30 horas, un acto conmemorativo do vixésimo aniversario da apertura deste centro universitario, que botou a andar no mes de decembro de 1997.

O vicerreitor de Coordinación do campus de Lugo, Javier Bueno Lema, e a directora da Biblioteca Intercentros, Julia Cantalapiedra, serán os encargados de abrir este acto, aberto á participación de todo o público interesado e no marco do que a compañía de Danza USC-Lugo porá en escena a peza ‘Que 20 anos non son nada’, unha obra dirixida por Juan Carlos Zahera e con coreografía de Rosa Acuña.

Os artistas do Espazo de Danza da USC integrados na compañía  luguesa Sonia L. Pumarega, Beatriz Morais, Adrea Naveira e Álvaro Rodríguez serán os encargados de interpretar esta coreografía, que estará precedida dunha intervención musical a cargo de Eva de la Torre.

Esta sesión conmemorativa será asemade o marco escollido polo Espazo de Danza da USC para render unha homenaxe póstuma á compañeira finada Elisa de Tomé coa lectura dun poema na súa lembranza.