Senior Innovation Lab

O envellecemento da poboación e un fenómeno solidamente constatado, e que alcanza en rexións europeas como Galicia un carácter progresivo e consolidado. A distribución demográfica por idade supón novas realidades para a empregabilidade e o emprendemento, e tamén novas necesidades de coñecemento nos diferentes eidos científicos e académicos. Arredor do envellecemento da poboación xorden estratexias específicas de innovación e transferencia (p.ex. co-deseño, interxeracionalidade, silver economy) que buscan ir máis alo dos estereotipos negativos sobre envellecemento patolóxico, dependencia e demencia asociados á idade avanzada. Senior Innovation Lab é unha experiencia educativa no ámbito das persoas maiores, consistente nunha serie de seminarios presenciais e traballo en liña, que busca favorecer a adquisición de coñecementos e ferramentas de innovación por parte do alumnado da USC para desenvolver novas solucións aos distintos retos e oportunidades dunha sociedade envellecida. Para o desenvolvemento de solucións innovadoras utilizarase unha aprendizaxe baseada en retos, traballando directamente con entidades do sector (Agadea Alzheimer, Ategal, ARC Os Tilos, DomusVi, Cruz Roja) en base ás súas necesidades reais, así como metodoloxías design thinking e lean start-up. Senior Innovation Lab forma parte do proxecto INnoVation and ENTrepreuneurship in HEI’s (INVENTHEI), do que a USC é parte convidada pola Universidade de Porto, dentro da EIT HEI Initiative (https://eit-hei.eu/projects/inventhei/).