Dr. Manuel González González

Ligazóns: Instituto da Lingua Galega | Real Academia Galega

Catedrático de Filoloxía Románica na Universidade de Santiago de Compostela, onde ocupou diversos cargos académicos. Foi Director dos Cursos de Lingua e Cultura Galegas para estranxeiros, organizados conxuntamente polo ILG, a RAG e a SXPL da Xunta de Galicia. É membro numerario da Real Academia Galega desde 1992, e foi nela secretario, tesoureiro e responsable dos seminarios de Sociolingüística e de Lexicografía e Terminoloxía. 

É director de Termigal e foi vicepresidente da Asociación española de terminología; coordinador científico do Centro Ramón Piñeiro para a investigación en humanidades; foi secretario do Instituto da Lingua Galega e codirixe o Atlas Lingüístico Galego; presidente de Puntogal, asociación encargada de xestionar un dominio lingüístico-cultural galego en Internet; director de Cadernos de Lingua; membro do comité de redacción do Atlas Linguistique Roman.

Forma parte do consello científico de prestixiosas revistas especializadas, e a súa investigación oriéntase fundamentalmente aos ámbitos da dialectoloxía, lexicografía, sociolingüística, historia da lingua e fonética. Foi dos iniciadores dos estudos de fonética acústica en Galicia, e dirixiu o equipo que elaborou Laverca. Diccionario de verbos galegos con voz sintetizada. Actualmente centra as súas investigacións nas tecnoloxías da fala; dirixiu CoToVía, o primeiro conversor texto-voz para o galego, en colaboración con enxeñeiros de telecomunicacións da Universidade de Vigo.