Introdución

O grupo Koiné (Estudos interdisciplinares de comunicación) desenvolve a súa actividade investigadora na esfera da Lingüística aplicada dende 1999, e convértese nun referente polo enfoque innovador no ámbito da linguaxe peculiar en proceso emerxente (adquisición) e en situación de merma (trastornos comunicativos). Sobre a base de atribuír valor propio á fala idiosincrática que non se acomoda aos patróns típicos (R. Jakobson 1956), o gran fito do grupo está na elaboración dun inventario de datos de fala infantil tratado electronicamente e segundo procedementos de codificación asociados ao sistema CHILDES (especializado en linguaxe atípica). O corpus Koiné na súa versión plana inicial figura no portal internacional CHILDES TalkBank dende 2006 (doi:10.21415/T5SW39).Nas coordenadas de traballo compartido no grupo, desenvolvéronse nove proxectos de investigación competitivos, téñense elaborado vinte Teses de Doutoramento, e están publicados máis dunha ducia de libros e dun cento de artigos científicos

Proxectos en curso

Adquisición fónica e corpus. Tratamento en PHON do corpus koiné de fala infantil (FFI2017-82752-P)

Resumo: O proxecto de investigación Adquisición fónica y corpus. Tratamiento en PHON del corpus koiné de habla infantil(con soporte económico do Ministerio de Economía, Industria e Competitividade: FFI2017-82752-P) dou canle á elaboración informatizada de repertorios de datos fónicos de linguaxe infantil para reunilos no depósito dixital PhonBank. O sistema PHON de tratamento automático de secuencias fónicas permite a análise das producións orais de cada un dos nenos que conforman o corpus Koiné de habla infantil, ata agora unicamente codificado nalgunhas das súas propiedades gramaticais. Os resultados do proxecto son novidosos e interesantes por dúas razón fundamentais. Primeiro, pola necesidade de dispor de bancos de datos fónicos ilustrativos da dinámica de adquisición oral do galego e do español que permitan achegarse á descrición do desenvolvemento fónico en cada lingua. Segundo, pola obrigada prioridade atribuída ás producións orais infantís: sen sons non se forman palabras, tampouco oracións, así que a dimensión fónica ten que contemplarse de xeito ineludible no estudo da adquisición.