Comeza a VI edición do Programa de Bolsas de Verán | CiQUS
-
O centro recibe aos estudantes beneficiarios da sexta edición do seu programa de bolsas de verán, que se desenvolverá durante o mes de xullo.
Esta mañá tivo lugar o acto de benvida aos novos estudantes que participarán na VI edición do Programa de Bolsas de Verán do CiQUS. Tras unha breve presentación, os directores do centro aproveitaron para felicitar aos recentemente chegados, animándolles a gozar da súa primeira experiencia investigadora. A continuación, tivo lugar unha visita guiada polas instalacións do centro e os bolseiros recibiron un curso de seguridade.
Deste xeito, os 15 alumnos seleccionados incorpóranse a partir de hoxe á actividade habitual do CiQUS, onde realizarán as súas prácticas durante o mes de xullo en colaboración cos distintos grupos de investigación. Ademais da U. de Santiago de Compostela, entre os bolseiros que participan nesta sexta edición hai alumnos procedentes da U. Complutense de Madrid, a U. de Oviedo, a U. de Murcia ou a U. da Coruña.
Supervisados polos investigadores principais do CiQUS, os estudantes terán o seu primeiro contacto coa investigación de vangarda, aprenderán a utilizar equipos e instrumentación sofisticada e ademais poderán participar nas distintas actividades científicas que o centro programou ao longo do mes, incluíndo seminarios internos e relatorios de primeiro nivel.