Programa de Mentoría EDIUS

A mentoría é un proceso a través do cal se ofrece ás persoas que están realizando os seus estudos de doutoramento e que contan con menos experiencia, apoio, asesoramento e estímulo para desenvolver unha carreira profesional investigadora satisfactoria. Ademais da axuda práctica, as persoas mentoras son modelos que desempeñan un papel importante, xa que representan a diversidade de enfoques que poden conducir a un obxectivo similar.

Contribuír ao desenvolvemento exitoso da etapa predoutoral dos e das estudantes dos diferentes Programas de Doutoramento que forman parte da EDIUS. Máis concretamente, os obxectivos específicos deste programa son:

• Facilitar o contacto e a interacción do estudantado de doutoramento con persoas co grao de doutor e con experiencia profesional no ámbito da investigación e a docencia ou fora do ámbito académico.
   
• Apoiar as persoas que están comezando a súa carreira investigadora na toma de decisións que afectarán ao desenvolvemento da mesma.
   
• Aportar un punto de vista externo que axude aos estudantes no seu desenvolvemento con coñecementos e habilidades baseadas na experiencia e que os guíe durante a etapa do doutoramento.

Poderán participar neste programa os/as estudantes matriculados en un programa de doutoramento da EDIUS (ata un máximo de 20 prazas).

En canto ás persoas mentoras, poderán participar todas aquelas que posúan o grao de doutor e con experiencia profesional no ámbito da investigación e a docencia (PDI ou investigadores pos-doutorais) ou fora do ámbito académico.

Ademais, será imprescindible completar a formación sobre iniciación e fundamentos do Programa de Mentoría no mes de setembro. Esta formación consistirá en unha sesión para os mentores e unha sesión para os/as estudantes mentorizados onde se explicarán os principios básicos para un desenvolvemento axeitado do programa.

Para participar no Programa será necesario que as persoas interesadas cumprimenten a solicitude de declaración de interese entre o 21 de maio e o 28 de xuño.

Pode definirse ao mentor/a como unha persoa con experiencia que axuda a moldear as crenzas e valores de outra persoa con menos experiencia de forma positiva para contribuír ao seu autocoñecemento e desenvolvemento persoal. Polo tanto a persoa mentora non ten por que pertencer á mesma profesión que o estudante nin ao mesmo campo de coñecemento.

A mentoría é o proceso polo cal un mentor anima a persoa mentorizada a reflexionar sobre os retos da súa vida, xa sexan profesionais ou persoais, e a través desta interacción permite a persoa mentorizada atopar as súas propias solucións ás súas preocupacións e, o que é máis importante, facer que se produzan cambios que permitan o seu progreso profesional e persoal.

Polo tanto, no noso contexto, o obxectivo final da relación mentor/a-mentorizado/a é que a persoa mentora externa sirva de elemento facilitador do proceso de doutoramento aos/ás estudantes inmersos en ditos estudos. A intención non é que sexa un activo científico, xa que iso é responsabilidade das persoas supervisoras e directoras da tese de doutoramento, senón que a persoa mentora, de modo independente, contribúa a que o/a estudante consiga planificar a súa carreira investigadora/profesional, aclare cuestións científicas transversais (ex. introdución a cuestións como a ética na investigación, ciencia aberta, etc.) ou asesore en cuestións relacionadas co benestar persoal, o equilibrio entre vida laboral e persoal/familiar e as relacións interpersoais. Neste senso, as persoas mentoras desempeñan un papel complementario ás funcións das persoas supervisoras/directoras da tese.

Este programa pretende que tanto mentores como estudantes mentorizados se beneficien do proceso de mentoría. Por unha banda, as persoas mentoras poden contribuír ao desenvolvemento da carreira académica e/ou investigadora de outra persoa compartindo os seus coñecementos e experiencias, o cal pode incrementar a súa sensación de logro persoal e satisfacción profesional. Ademais, este proceso pode contribuír a seguir desenvolvendo as súas habilidades técnicas e interpersoais. Por outra banda, os/as estudantes mentorizados recibirán unha orientación personalizada baseada na experiencia profesional e os coñecementos das persoas mentoras, pois estas poden compartir leccións importantes aprendidas en momentos clave da súa carreira profesional/académica ou as cousas que desexarían saber antes de alcanzar fitos importantes na mesma. Ademais, participar nun programa deste tipo pode aumentar a motivación e servir de inspiración durante esta etapa predoutoral.

* Recoñecerase a participación no Programa de Mentoría por parte da Escola de Doutoramento Internacional da USC coa correspondente certificación.

A inscrición no Programa de Mentoría desenvolverase entre maio e xuño de 2024. Unha vez realizadas as inscricións, durante o mes de xullo realizarase a selección dos participantes e os emparellamentos mentor-estudante mentorizado.

Previo ao inicio, organizaranse dúas sesións formativas (unha para mentores e outra para os/as estudantes mentorizados) no mes de setembro. Nestas sesións explicarase máis en profundidade o programa, os seus obxectivos, os recursos dispoñibles e tamén será unha oportunidade para resolver dúbidas e cuestións.

O inicio do proceso de mentorización está previsto que se desenvolva entre outubro do 2024 e xuño do 2025. Durante os nove meses de duración do programa recoméndase organizar unha sesión de mentoría cada 20-30 días. Nas sesións formativas previas explicaranse os aspectos básicos para o desenvolvemento de ditas sesións e que o Programa de Mentoría logre os seus obxectivos. Ademáis, proporcionarase a seguinte documentación:

1. Acordo de confidencialidade: dado que o Programa de Mentoría debe ser unha contorna segura na cal poida partillarse libremente información entre as dúas partes, debe asinarse ao inicio do mesmo un acordo de confidencialidade. Deste xeito, búscase xerar confianza, así como establecer límites claros sobre como debe tratarse la información que se abordará durante as sesións de mentoría.
    
2. Acordo de mentorización: trátase dun documento onde se define como e cando se reunirán os participantes, así como as actividades que aseguren que se cumpren os obxectivos de mentoría.
    
3. Rexistro de encontros: Os participantes deberán rexistrar as reunións e actividades de xeito que se poida avaliar o grado de participación no programa.
    
4. Avaliación final do Programa de Mentoría, tanto por parte dos/as estudantes mentorizados como das persoas mentoras.